|
Aurten, azaroaren 19an, Begoñazpi Ikastolan Gazte Role Model sarien banaketa izan genduan. Dakizuenez, sari honeek enpresa eta solidaridade arloak saritzen dauz. Oraingoan, enpresa munduari jagokona Juan Luis Arregui enpresaburuari eta solidaridadeari jagokona Luis de Lezama abadeari emon deutsegu.
Juan Luis Arregui ekintzailea, urduria eta berrikuntzen zalea izateagaitik nabarmentzen dan enpresaburua dogu. Izatez, Mallabiakoa, Bilboko Ingeniaritza Goi Eskolako ingeniari teknikoa, Alemaniako Wandsdorfen Zenbakizko Kontrolean graduatua eta Frantziako Besançonen Mikromekanikako masterduna.
Gaztetarik ibili da gogo biziz eta ilusio handiz abian jarri dauan enpresa-proiektu bakoitzean, beti ere, filosofia berberarekin: egin beharrekoak modu desbardinean egitea. Pentsaera eta egiteko era hau izanik, Juan Luis Arregui azken hamarkadetan, Euskadiko enpresaburu garrantzitsu bihurtu jaku, punta-puntako diran Gamesa, Iberdrola, Ence edota Foresta bezalako enpresak sortuz eta bertan parte hartuz. 1990etik hona, hain gogoko dauazan eta sustatzaile sutsua dan energia barriztagarrien inguruan dabil lanean. Gaur egun, administrazio-kontseiluko eta ENCE exekuzio-batzordeko presidente da. Azken enpresa hau zelulosa eta energia biomasarekin ekoiztegaitik da eredu. Aurten, Joxe Mari Korta saria jasotzeaz gain, Urteko Arabar be izendatu dabe.
Bere ezaugarrietako bat hauxe da: ekin eta eraiki. Badaki zein dan bere lana. Gauzarik gatxena erraz eta naturaltasunez azaltzen dau. Lanari ekiteko grinagaitik, bere jarduera profesionalagaitik eta bere enpresa-ibilbide bikainagaitik, emon deutsogu Gazte Role Model saria. Uztartzaile bikaina
Bestalde, On Luis de Lezama dogu, lan ezbardinetan dabilen abadea; ondo baino hobeto uztartzen dauz elizako zein ostalaritza edota kazetaritza lanak, guztietan emaitza bikainak lortuz.
Amurrion jaioa, 1962an egin zan abade. 1972an erlijio-irratsaiorik onenagaitik Ondas saria irabazi eban. 1974an, aterpetxe bateko gazteakaz, bizibide eta ogibide dauan Alabarderoaren taberna sortu eban. Urte batzuk geroago, Suitzako Laussaneko Ostalaritza Eskolan graduatu zanetik, irakaslan eta enpresa jardueran dabil Madril, Sevilla, Marbella, San Pedro de Alcantara, Washington, Seattle, Zaragoza eta Kordobara hedatu dan ostalaritza-talde bat be sortuz. Leku horreetan guztietan 600 gazte inguruk lan egiten dabe eta Ostalaritza Goi Eskolan 300 gaztek baino gehiagok atara dabe unibertsitate titulua.
Hainbat izan dira jaso dauazan sariak, besteak beste, 1998an Euskal Herritar Unibertsala saria, Espainiako Turismoko Urrezko Domina eta Frantziako Meritu Zibilaren Ordena.
Etika eta giza-printzipioak aldarrikatu, pobrezia, marjinazio eta analfabetismoari aurre egin eta hainbat gazteri ilusio eta itxaropena emoteagaitik irabazi dau, ba Gazte Role Model saria. Ikasleen aurrean
Saria jaso ondoren Batxilergoko ikasleakaz lan-jarduera izateko konpromisoa hartu eben. Hori dala eta, abenduaren 19an Juan Luis Arregui geugaz izan genduan. Lan saioan, Juan Luisek gazteek egin eutsiezan bizitza eta lan ibilbideari buruzko hainbat galderari erantzuteko aukera izan eban. Bereziki berari ondo joan jakozan hiru balore nabarmendu ebazan: eskuzabaltasuna, leialtasuna eta ahalegina/ konpromisoa. Era berean, aholkua be emon eutsen gure gazteei: “Egiten dozuena, gogo biziz egizue”.
Ikastola batek, euskaldun enpresa gizona, aintzat hartzea oso garrantzitsua izan dala beretzat jakinarazi euskun. Amaitzeko eta esker ona jasoz taldeko argazkia atara genduan.
Aurtengoa egin dogu baina datorren urtean, Luis de Lezamaren ordua izango da, opor ostean bertan izango dogu bere testigantza eta bizipenak emoteko eta.
|
