|
Ohiko jaialdi bat baino gehiago da Zurbaranbarri HIn abenduan antolatu ohi duguna. Horregatik daramagu 17 urtetik gora jaialdia antolatzen. Ikastetxeko kideok bat eginik aritzen gara elkarkidetza eta bizikidetza balioen alde lanean.
Gure eskolan ohituta gaude elkarkidetza eta bizikidetza lantzen, azken urteotan hainbat proiektu konpartitu baititugu UNICEF, Mugarik Gabeko Medikuak, Lagun Artean eta Alboan erakundeekin. Astero etortzen dira gure eskolara hirugarren zikloko ikasleekin lan egitera. Hori dela eta, gure ikasleek garatu ez diren herrialdeetan dauden arazoak oso ondo ezagutzen dituzte, batez ere, haurtzaroari dagozkionak. Horregatik gure egin dugu Eskola gara, munduan gara izeneko leloa.
Ekintzarik garrantzitsuena Gabonetako jaialdia da eskolako kide guztion lana bere osotasunean ikusi baitaiteke bertan. Ikasturtero ospatzen dugun jaialdia, abenduaren bigarren larunbatean, ikasturtean zehar lantzen dugu. Eta jaialdian saldutako sarreren dirua aurreko erakundeen esku jartzen dugu elkarkidetza eta bizikidetza proiektuetara bidera ditzaten. 2007-08 ikasturtean Lagun Arteanek Guatemalan dituen proiektuetara bideratu zen eskolak lorturiko dirua, 2008-09an UNICEF erakundera, 2009-10ean Mugarik Gabeko Medikuak erakundera eta iaz Save The Children erakundera. Urte osoko lana
Ikasturte hasieran, urrian, klaustrokide guztiak biltzen gara proiektua antolatzeko, lana eta ardurak banatzeko. Zuzendaritza taldea IGEko kideekin elkartzen da norberaren eginbeharrak adosteko eta babestu nahi den gobernuz kanpoko erakundea aukeratzeko. Aukeratutako erakundearekin harremanetan jartzen gara eskolara etor daitezen gure ikasleei babestuko den proiektuaren berri emateko. Ikastetxeko talde bakoitzak jaialdirako lana prestatzen du: kantak, antzezlanak eta dantzak. Gurasoak eta atezainak jaialdia ospatzeko behar den guztiaz arduratzen dira –aulkiak, eszenatokia, soinua…–, baita sarreren prezioa adosteaz ere. Institutuko ikasleek ere laguntzen digute batik bat aurkezpen lana eginez. Orain dela urte batzuk, bi arratsaldez jarraian burutzen zen jaialdia. Orain, berriz, larunbat arratsaldean soilik egiten dugu. Kiroldegian. Leku handia da, baina baita hotza ere. Berogailu erraldoiak alokatzen ditugu tenperatura epeltzeko. Ondorio anitzak
Eskola gara, munduan gara egitasmoak ondorio anitzak ditu ikastetxeko zein Zurbaranbarriko auzotarrentzat. Alde batetik, guztiok batera lan egitean, eskolako kideon harremana estutu eta hobetzen da. Hori dela eta gure ikasleen heziketa emankorragoa da. Agian, ondorio hau da garrantzitsuena. Horri esker ikasleen portaera oso ona dela esan dezakegu. Beste aldetik, ikasleen gaitasun burutzapenak indartzen dira hurbileko helburu zehatz batean lan egitean. Informazio eta teknologia berriak (IKT) erabiltzen ditugu egitasmoan eta horrela ikasleen gaitasunak sendotzen dira arlo horretan. Bada hirugarren ondorio bat ere: ikastetxean erabiltzen ditugun hiru hizkuntzak (euskara, gaztelera eta ingelesa) sendotzen ditugu prestaketa lanek dirauten bitartean.
Hedapen handia du, aipatu bezala, gure jaialdiak, baita eskolatik kanpo ere. Parte-hartzea oso zabala denez, hamaikatxo auzokide hurbiltzen zaizkigu, auzoa inplikatzeko ahaleginean. Integrazio egokia, alaia, fidagarria eta maitasunez egina lortuz gero herritar ezin hobeak bereganatuko ditugu.
|
