Mahats Orriak
Komunitatearen bloga

Sustaturen 5. urteurrena ospatzeko abenduaren 11ra arte blogetan publikatzen den interesgarrienari saria emango diote. Euskaraz publikatzen dena sarituko dute, eta fotoblogak edo bideoblogen kasuan euskaraz funtzionatzen duen gurea bezalako komunitate baten publikatzen bada hartuko dute aintzat.

Abenduaren 11ra arte daukazue aukera beraz karteran gordeta daukazuena botatzeko. Konpetentzia handia dago, baina probatzeak ez digu kalterik ekarriko.

Hemen dauzkazue informazioa eta sariketaren arauak:

Sustaturen sariketa: euskal blogetako mezurik onenari saria

(http://www.sustatu.com/1164120776)

Zorionak Sustatu! Eta segi horrela urte askoan!

Blog berri bi aste honetan: Gure txokoa eta Hasier-en bloga.
Gure Txokoa berbalagun talde baten bloga da. 5 lagunen artekoa. Berbalagun talde baten lehenengo bloga izan daitekeena. Esperientzia berria eta interesgarria.
Bestalde, Asapalak antoaltzen dituen Yoga tailerren irakasle ibili den Hasierrek eguneroko modura atondu du blog pertsonala, berak dioen modura literaturaz, konzientziaz eta ezerezaren kare-morteroaz arituko da. Blog pertsonal-pertsonala eta googetarako propioa.
Ongi etorri beraz, bitartean Mediaberriko Mikel dabil jo eta su albiste interesgarriak eta beste inon topatzeko zailak plazaratzen.

Gure komunitate honi ate berria ipini diogu, mahatsorriak.org domeinua hain zuzen ere. Momentuz, hori baino ez da, sarrerako atea. Oraingoz ez du blogen helbideetan eraginik izango.

Adibidez, Mahatsorriak blog honen helbidea www.asapala.org/mahatsorriak/asapala.php da. Erabateko berbiberatzea egiten dugunean www.mahatsorriak.org/asapala.php izan beharko luke, baina oraingoz lehengo helbidearekin jarraituko du.

Ate berria beraz, laster baten gelekin ere hasiko gara.

Asapalaren e-postara sarri etortzen dira beste erakunde batzuek antolatzen dituzten ekitaldiak eta deialdien berri ematen diguten mezuak. Euskararen inguruko kontuak izaten dira askotan, eta auzokoak.

Horrela bada, blog berezia sortu dugu gurera etortzen diren horiek zabaltzeko: Auzoko euskalgintzaren albisteak.Heltzen zaizkigun informazioekin osatuko dugu, gure inguruan egiten diren hainbati zabaltzeko beste aukera bat emateko.

Beraz, auzoko taldeok, erakundeok edo euskaltzaleok orohar hemen zerbait agertzea nahi baduzue, bidali Asapalara e-postaz (asapala ABILDUA euskalnet.net)eta guk publikatuko dizuegu.

Komunitatea sortzearekin batera lehenengo blogak sortu dira. Hemen dauzkazue pole position horretan ipini direnak:

Blog kolektiboen artean blog planeta, komunitatearen berriak eta partaideentzako foroaz gainera hauek dauzkagu:

• Mahatserriko Berbalaguna: Berbalaguna eta berbalagunen bloga da hau. Haren inguruko albisteak, proposamenak, ideiak eta berbalaguneko partaideen ekarpenak jasotzekoa.
• Mahatserriko fotobloga: Kamara digitalen zabalkundearekin argazkilari amateur-en kopurua ere bider-biderkatu egin da. Auzotik irten barik erretratu interesgarriak egin daitezke, eta inork erosiko ez badizkigu ere, hemen munduari erakusteko eta komentatzeko lekua. Blog irekia da, argazkiak erakutsi gura dituzuen guztioi zabalik. Parte hartzeko kontua zabaltzeko komunitatearekin kontaktuan baino ez duzu egin behar.

Blog pertsonalen artean, lehenengo blogariak agertu dira, blogen erabilera desberdinetako ispilu izan daitezkeenak:

• Mediaberri: Mikel kazetari santutxutarrak aurretik hasitako informazio proiektu bati emango dio segida blog honen bidez. Informazio alternatiboa eta haren gaineko hausnarketa.
• Txabola: Joseba Txabola mahatsorriak ikasbloga egiteko asmoa dauka. Bere lanerako tresna modura. Hezkuntza munduan sano zabaldu dira blogak azkenotan, eta komunitate honetan interesatuta dauden irakasle, ikasle eta mundu horretako guztiei arreta berezia eman nahi diegu.
• Trokatik: Santutxu, Begoña eta Iturribide arteko mugatik, Karrajuan euskaltegien gainekoekin nahikoa ez, eta auzoko kontuen gainean jarduteko abenturan sartu zaigu Benito.
• Matzorrianori kendute: Misterioa da blog honen ingurukoa, zelan ez dakigula hemen agertu zaigu. Egileak erlazioa dauka Bertonen publikatzen den zutabe batekin. Pertsona bera ez ei da baina. Bertonekoek zeozer dakitelakoan, haiei galdetu eta eurek ere misterioa. Lehendik datorren zeozer ematen du. Irakurrita zeozer argituko al digu! 

Hasiera orriko itxura eta "skin" berriak instalatuta daude. Gehiago sartzeko asmoa daukagu, baina oraingoz hasteko baduzkagu batzuk. Baten batek bere blogentzako itxura pertsonalizatua gura badu, eta html eta css kontuetan apur bat abila bada, administrazio gunean "ereduak" fitxan sakatuta tuneatzeko aukera dauka. Bestela, gurekin kontaktuak jarrita ahal dugun neurrian lagunduko diogu, zerbitzuaren barruan ez dago sartuta blogaren diseinuaren pertsonalizazioa, ez dugu ezer prometitzen beraz, baina saiatuko gara.
Orain beste erronkatxu batzuei ekingo diegu:

• WYSIWYG editorea sartzea. Orain dagoena nahikoa "purua" da, informatikaren puristek eskertuko dute, baina erabiltzaile askorentzako apur bat nahastosoa izan daiteke. Momentuz, Firefox erabiltzen duzuenoi XihnaHere! plugina erabiltzea gomendatzen dizuet.
• Blogeko mezuetan objektuak txertatzeko modua: Youtube-ko bideoak, Tagzaniako mapak eta halakoak. B2evolution software hau oso zehatza da web dokumentuen itxuran eta kodigoaren estandarrak betetzen, eta halakoek askotan arauok urratu egiten dituzten legez egokitzapenak egin behar dira sartzeko
• Komunitatearen aurkezpen ofiziala. Zer pentsatzen duzue? Hau ospatu barik geratuko dela? Ideiarik?