Auzoko euskalgintzaren albisteak

Lehengo egunean Ber2e gazte taldeak antolatu zuen jaiaren berri eman genuen. Jaian Berbalapikoa aldizkaria banatu zuten. Berbalapikoa hau aspaldian egiten hasi ziren, baina aspaldian eduki dute etenik. Zortzi orridaldetan ipuinak, iritzia eta taldearen berri ematen dute.

Horrezaz gaineraz, bloga ere atondu dute, taldearen eta taldeak egiten duenaren berri emateko asmoarekin. Berton aldizkarian publikatutako artikuluak eta lehengoan aipatu genuen kanpainaren azalpena ere ematen dute: IPUINA

Hemen daukazue bloga:

Ber2e

Blogger zerbitzua erabili dute bloga atontzeko. Beharbada ez dute Mahatsorriak.org komunitate honen berri izan. Interesgarria izango litzateke Santutxuko gazte euskaldunen iritzia ere hemen plazaratu ahal izatea.

Giro goxoa egon zen atzo, larunbata otsailak 10ean, Bilboko Kafe Antzokian. Arrazoia: Urtxintxa eskolaren 20. urteurrena.

Aisialdiko hezkuntzan leku propioa duen eskola honek badu Mahatserriarekin harreman zuzena, egun Zabalbide kalean kokatua baitago.
Eskolaren aurkezpena horrela egiten da beren webgunean:

Zer da urtxintxa

URTXINTXA Astialdiko Eskola 1.986an jaio zen astialdi hezkuntza eredu ezberdin eta berritzailea eskaintzeko asmoz. Gure ekintza nagusiena Heziketa Ez Formalean hezkuntza bultzatzea eta garatzea da, ekite komunitarioan Jarduteko gizarte-agenteak prestatzeko helburuaz.

Ehun lagunetik gora bildu ziren goizean hasi eta egun osoa iraun zuen jaian. Tartean izan ziren Urtxintxako sortzaileek umorez kontatutako antzinako istorioak, bertsoak, kantuak, jokuak, opariak, bazkaria, dantzak eta sano luzatu zen jai giroa.

Zorionak Urtxintxa eta Urtxintxakideak!