Hasier

Asanak ondo gorderik du bere sekretua. Ez da ezer egin behar asanan zaudenean. Gogoa zerbait egiteko programatua izan arren, asanan ez duzu ezer egingo.

Erramun Landak xakean behar zuen atzo Bilboko Hikaateneoan. Asteazkenero egiten zuen. Txantxa asko egiten genituen elkarrekin Duchamps berria ote zenentz? Artea utzi eta xakean murgildutako artista askea. Irekiera Errege-Indioa aztertzen ari zen, bere pertsonalitatea islatzen zuen irekiera horrekin: duina, berritzailea, loturarik gabekoa. Alta, Espainiako "justizia"k ez zion utzi hain gogoko zuena aske egiten: 64 laukitxo zuri-beltzen artean fantasietan galtzea. Nobedade teorikoa ote da Erramun?

Euskal musikari batekin hausnarrean. Nola islatu bizitza pribatua sasi-kuxkuseo morbosoan erori gabe: Rufus Wainwright-ek asmatu duelakoan nago. Bere ama hilzorian dago eta Martha arrebari deika ari zaio. "Ama gaizki dago Martha, zatoz Iparraldera arren". Heriotzaren aurkako garrasi lazgarria egin du azken diskoan. Come a long way- honetan, ordea, anai-arrebek ez dute heriotzaren berririk.

Iritziak bilatzen dihardut interneteko foroetan: kirol, sexu, filosofia zein buru-soiltzearen aurkakoak. Canetti-k ihesalditik aterako nau ezuste bortitzez: "Nire xede serio eta zehatza, nire bizitzako ageriko eta adierazitako helburua gizakientzat hilezkortasuna lortzea da".