Ahuntzaren Eguerdiko Doministikua

Zuek ez dozue ezagutu, baina orain dala hogei urte bizikleten ordez kotxeak, motorrak eta furgonetak bakarrik egoazan, tranbiak uriko gune turistikoak baino ez ebazan zeharkatzen eta itsasadarrean gaur egun dabilzan “Bateau-mouche” moduko itsasontzi guztiak eta uretan bestelako trafiko handia ez zan ibilten. Arabiera oraindino hizkuntza ofiziala ez zan, eta euskarazko telebista kate bakarra egoan. Uriko zazpi kale zaharretan oraindino bilbainadak entzuten ziran, lantzean behin, hori bai.

Laba Garaietaz ez berba egitearren, edo ontzioletaz, edo Artxandako atrakzino parkeaz, edo Zubizarreta, Dani, Sarabia eta Urtubitaz... Ez dot aitite astuna izan nahi, baina gaur egungo futbola jada ez jat gustetan, eta entzuten dozuen musikaz zer esanik ez... Gustetan jatana kanpoko espazioan bidaiatzeko dagozan aukerak dira, lehenago Ilargira dirudunak soilik joaten ziran. Eta gustetan jat halaber zelan aurreratu dan Medikuntza. Neuri HIESa diagnostikatu eustienean jente asko hiltzen zan, atara kontuak gaur txertoa eta guzti badagoala. Orduan ez, ganera pastilla mordoa hartu behar genduan egunero, hogei edo gehiago, eta halandabe ezagun asko ikusi ditut hiltzen...

Gaur bero sapa honek neu hil behar nau, orain dala hogeita hamar edo berrogei urte zirimiri egoan sarritan, uriko paisaiaren zati bat zan. Baina zuek gazteegiak zarie. Ez dozue sinetsiko, baina uri honetan orain dala hogeita hamar urte zezenketak egiten zituzten, zezenak hiltzen zituzten ikusleen aurrean hauek txaloka eta bibaka egiten eben bitartean. Neu beti basakeria haren kontra egon nintzan, bana egia da sasoi hartan oraindino erailketak, bahiketak, txantajeak, torturak eta bestelako kontu itsusiak be gertatzen zirala. Neu be urte askotan beste leku batera begira egon naz. Ganera, birusa neukala jakitean bardin jatazan besteen zorigaitzak eta abar. Baina une bat iritsi zan, ez dakit noz izan zan zehazki, zuek jaio zinatenean-edo. Zuek ez dozue ezertan sinisten, baina neuk post-independentzia edo dana dalakoaren egoera hau atsegina begitantzen dot. Estetikoki bizarrak, nuklearren aurkako pegatinak eta koadrodun alkandorak nahiago nituen, baina deukogun hau lehenagokoa baino hobeto dago, aitortu beharra dago. Ruper Ordorika ez dozuela sekula entzun, benetan?

 

Aita eta euskalduna bazara, 2009ko udaberrian zeure umeak (umeek) 3 urte baino gutxiago edukiko badu(te) eta kilometro bat harekin (eurekin) batera egiteko sasoian bazaude, segi irakurtzen mesedez:

1. Ez zaigu interesatzen oinaztarra, ganboatarra edo Gaztelako Koroaren aldekoa zaren, ezta Athletic edo Osasunaren aldekoa, Erreala, Eibar edo Alavesen aldekoa zaren ere. (Real Madriden aldekoa izanez gero, joan 5. puntura).
2. Aita Berri Euskaldunen (ABE) elkarteak gonbidatzen zaitu aldarrikapen-ekimen bikoitz batera: Alde batetik gaur egungo aiten eskubideak aldarrikatu nahi ditugu eta geure aurkako bazterketa salatu, eta bestetik datorren urteko “Korrika 16”an parte hartzea kilometro bat erosiz.
3. Ekimena ABE elkartearen izenean izango zen, beraz eskatu behar dizugu oinaztar, ganboatar edo Gaztelako Koroaren aldeko ikurrik ez ekartzea, ezta Athletic, Osasuna, Erreala, Eibar edo Alavesen aldekorik ere (are gutxiago Real Madridekorik!).
4. Denbora asko aurrean dugunez, aholkatzen dizugu umeekin batera entrenatzen joatea (motxilan, aulkian edo eskutik helduta), bai eta geure elkartearen aldeko leloak ikasten hastea ere: “Hemen gaude, aitatxoon alde”, “Ttipi-ttapa, ttipi-ttapa, Ai aita!”, “Espermatozoiderik gabe, umerik ez”, “Geu ere fardelak aldatzen”, “Aita hizkuntza, ra-ra-ra!”, “Gora ABE korrikazaleak!”.
5. Kilometroaren erosketa denen artean egingo genuen, kopuru bera ordainduz. Hala ere, Real Madriden aldekoa izanez gero, kuota bikoitza ordaindu behar izango zenuen, besteon onurako.

Gaurko egunkariak beste hautagai bat dakar aurtongo Ahuntzen Sarietarako: Montserrat Guibernau. Hauek dira haren berbak, "Nazionalismo kosmopolitaren utopia" artikulu txit interesgarrian bilduta:

"Nazionalismoaren aurpegi baikorra herri izateko eskubidea defendatzen duena da; bere nazio identitatea eraikitzean oinarritzen dena, kultura mantendu eta sortzen duena, pertsonalki aberasten duena eta munduan zehar besteekin harramanetan dena."

"Sarri eskatzen zaie ahulenei kosmopolita izan daitezela. Baina bere identitatea eta kultura alboratuta izan daitezela kosmopolita."

Geuk, forofook, "beti" esaten dogunean (..."beti, beti maite, maite maitea"...) "beti" esan nahi dogu. Sasi hauen eta hauen ganetik.

Hordago txuri-urdina txikira!

Zabalburu dago, badakigu, eta harago Malmasingo tunela. Baina autonomia politikoaren harago zer dago?

Gizartea zatikatzea, konstituzinotik kanpo dagozan abenturak, batzen gaituena baino ezbardintasun artifizialak bilatzen tematzea, hizkuntza txikiak eta pobreak inposatzea. Ganera, lurralde aberatsekoak izanda, separatistak insolidarioak dira, xenofoboak, arrazistak. Gizon zuri jakintsuak hala dino.

Eskerrak presidenteak geldiaraziko dauala, edo bestela auzitegiek, edo beste erremediorik ez badago armadak.

Holan kontatzen eustan hango lagun batek:

"te cuento.. que todo aqui,, en un clima..muy tenso, donde la charla de todo el mundo es sobre el referendum , evo... con sus politicas.. ect.. pero como tu vistes.. esto ya era de tiempo.. cambas contra collas... o mejor dicho oriente,,, contra occidente... es que es otra la gente..otra la cultura la forma de vivir,, pensar. en fin pero todos bolivianos.. el gobierno quiere imponer su nueva constitucion politica del estado.. que ellos mismos la hicieron y la aprobaron dentro de un cuartel militar.. mucho enfrentamiento pero todavia hay que hacer la ultima consulta al pueblo o sea otro referendum para aprobarla o desaprobarla.. este anterior fin de semana fue muy tenso.. se votaba por autonomia departamental de santa cruz.. que hace dos años venimos pidiendola... y la gente del MAS del partido de gobierno de evo lo impide a toda costas.."

Halandabe, autonomiatik harago, autodeterminazinotik harago eta independentziatik harago post-independentzian pentsatzen hasi beharko ginan agian. Akaso.

( "Botxokaria"k ez dau zertan bat egin kolaboratzaileek bidalitako eritxiekin).