Ahuntzaren Eguerdiko Doministikua

Orain dela urte batzuk hiztegia.net web ataria sortu zuten. Bertan, hiztegi orokorrak egoteaz gain, gaikakoak ere joan dira sartzen, eta gaur egun arkitektura, justizia, iturgintza, makina erreminta, odontologia, telekomunikazio eta SMSen hiztegi espezializatuak topa ditzakegu, beste askoren artean. Adibidez, Osasungoa Euskalduntzeko Erakundeak egindakoa kontsultagai dago, hitz medikoak edo osasun arlokoak jasotzen dituena eta arlo honetakook oso tresna baliagarria duguna.

Bestela, erakunde horrek orain dela 20 urte hasi zen urtero osasun jardunaldiak antolatzen, gai baten inguruan eskainitakoak eta osasungintzako hainbat profesional mota biltzen gaituztenak, beti ere euskara komunikazio tresna delarik. Denborarekin hobekuntza nabaritu izan da parte hartzaileen aurkezpenen kalitateari dagokionez, eta hiztegia finkatzen doala ere igartzen da. Aurten ere, Arantzazuko (Oñati) topaketan, horixe baieztatu dugu asteburu honetan bertan. Eta, oso pozgarria izateaz gain, gurean gero eta sarriagotan entzuten den dikotomia faltsua kolokan ipintzeko balio digu: Antza denez batzuk ez dute mediku euskaldunak nahi, mediku onak baizik. Eta guk ez dakigu profesional euskaradunak txarrak garela aditzera eman nahi duten, edo ezaugarri biak zergatik ezin ditugun kontuan hartu. Zalantzan ez dagoena da osasun arloko profesional euskaldun on ugari dugula, eta horixe eskatzen duela gizartearen zati handi batek.

Beraz, demagogia eta manikeismoari muzin eginez, segi dezagun geure hiztun komunitatea aberasten. Kioskoetan aldizkari espezializatu gehiago behar ditugu eta Interneten blog espezializatu gehiago. Farmazilari euskaldunak 1994tik martxan daude eta informatikariek iaz euren 7. bilkura egin zuten. Espezializatzea ala hil!