1976

Herritarrentzat, herritarrekin

Sat, 27 Apr 2013 22:13:39 +0000

Udaltop jardunaldietan parte hartu dut joan den astean. Nahi baino hitzaldi gutxiago entzuteko aukera izan dut, baina gauza interesgarri batzuk entzuteko eta instituzio publikoetako euskara teknikarien arteko giroa ikusteko baliagarriak izan zaizkit.

Egunotan burura etorritako zenbait gogoeta jarraian:

Kolektibo konprometitua

Denetarik dago euskara teknikarien artean (ere), noski. Hala ere, oro har, egiten dutenarekin konpromiso handia duen jendea ikusi dut. Aurkeztutako ponentzietan eta entzuleen galderetan zein talde lanetan "betebeharretik" harantzagoko interesa nabarmena izan da, ez dut funtzionarioaren eredu esterotipiatua ikusi orokorrean, bihotza ere nabari da.

Geldirik ez

Berritzeko gogoa ere ikusten da; bide berriak bilatzeko, ezezagunak diren esparruetan sartzeko, orain arte egindakoak aldatzeko eta burua irekitzeko gogoa. Bosgarrenez antolatu dira Udaltop jardunaldiak (Lasarte-Oriako euskara zerbitzuak du horren "errua", kalitatea ez da kasualitatea beraz) eta datu aipagarria da 170 lagunek parte hartu omen dugula, gehien-gehienak udal euskara teknikari edo arduradunak. Esperientzia berriak aurkeztu dituzte zenbait udal teknikarik eta erakundek, udal eta herritarren arteko harremanetan euskara gehiago erabili dadin saiakera ugari egiten ari dira.

Autopertzepzioa

Eragiteko ahalmen handia duen kolektiboa ikusi dut (nahiz eta batzuek ez dakiten edo ez duten hori pentsatzen). Arduradun politikoen konpromiso edo konpromiso faltari buruz berba egin dute teknikariek momenturen batean eta, alde batetik arrazoia dute, arduradun politikoek pisu handia (erabakiorra) dute instituzioen erabakietan; baina beste alde batetik, erakundeen funtzionamenduan, ohituratan, jokaeratan eta politiketan bertoko teknikari, langile, funtzionario eta laguntzaileek ikaragarrizko garrantzia dute. Eta horretaz kontziente izatea oso garrantzitsua da, kontzientzia horretatik bakarrik balia baitaiteke eragite gaitasuna. Inpresioa ematen dit teknikari batzuek (askok, gutxik,... ez dakit) ez dutela horrela ikusten eta beraien arduradun politikoen ikuspegi/konpromiso/sinesmen faltak beraien eragin ahalmena blokeatu egiten duela. Pena bat da.

Gehiago ere esango nuke: teknikari konprometitu antolatuek izango luketen eragin ahalmena oso handia litzateke, hortara jarriz gero.

Norentzat eta norekin

Eta azkena, esanguratsua. "Nola aktibatu herritarrak udalarekin euskaraz jarduteko?" galderari erantzun nahi izan dio aurten Udaltopek. Jardunaldietako zenbait ponentziatan lau zutabe (protagonista) aipatu dituzte udaletako euskara planetan: arduradun politikoak, udal langileak, euskara zerbitzua eta herritarrak. Jardunaldietan entzundakoetatik bi arrisku baieztapen horretatik tiratuz: 1) herritarrak hartzaile (bezero) huts modura ikustekoa, eta 2) herritarrak norbanako modura bakarrik kontuan hartzekoa. Bigarren arrisku horri jarraituz eta hainbat urtetan zehar instituzio publikoetako arduradun politiko eta teknikari ugarirekin izandako harremanetan ikusitakoa aintzat hartuz, ematen du hainbatentzat (batzuentzat, ez guztientzat, ezta gehiengoarentzat ere) herritar antolatuak arrisku, mehatxu edo traba direla (auditore, fiskalizatzaile edo kontrolatzaile). Akatsa! Gizarte mugimenduak bete ditzakeen funtzio guztiak ez ulertzea da hori. Akuilu bai, akuilu izan behar dira gizarte mugimenduak eta, hori, teknikarientzat pizgarri behar luke; baina gainera, aliatu ere izan daitezke herritarrak. Gizartean aurkitu dezakete batzuetan etxean aurkitzen ez duten laguntza.
Adibide onak badaude, bide erakusle direnak (batzuk entzun genituen, tartean Arrasateko berdintasun teknikariak azaldutakoak).

Datorren urteko jardunaldietan sakontzeko moduko gaia: gizarte eragile eta euskara teknikarien arteko lankidetza.

Demagun... munduko alkaterik onena dela

Thu, 10 Jan 2013 00:57:30 +0000

Demagun... Belfasteko alkateak Britaniar armadaren erakusketa militar baten irekiera ekitaldian parte hartzen duela

Demagun... Erromako alkateak ez dakiela italieraz edo Montrealekoak ez dakiela frantsesez

Demagun... Bartzelonako alkateak, katalana ez jakiteaz gain, katalan hiztunik ez balego modura jokatzen duela

Demagun... Los Angeles-eko alkateak polizia eta beltzen arteko harremanari buruzko txisteak egiten dituela

Demagun... Tokioko alkateak gazteen alkohol eta droga kontsumoa gaitzesten duen bitartean shake edale edadetuak "Tokiotar ilustre" izendatzen dituela

Demagun... Atenasko alkateak erlijio katolikoaren elizak eraikitzeko arazoak jartzen dituela, gehiegi daudelakoan

Demagun... Rio de Janeiroko alkateak hiri guztiko ihauteriak oztopatu eta Sambondromo nagusia bakarrik mantendu nahi duela

Demagun... Sevillako alkateak apirileko feria nagusian bi elkarteri beraien "kasetak" jartzea debekatzen diela (eta ondoren epaileek elkarteei ematen dietela arrazoia)

Demagun... New York-eko alkateak inbertsio guztiak Manhatan-en egin eta hiriko gainontzeko distritoak ahaztu egiten dituela

Demagun... Buenos Aires hiriko alkateak kalean musika tresnak jotzea debekatzen duela

Demagun... Berlingo alkateak hiriko zentro kultural autogestionatu garrantzitsuena eraitsi egiten duela interes inmobilarioengatik

Demagun... Amsterdamgo alkateak "gizalegezkoak ez diren sexu jarduerak" kalean egitea debekatzen duela

Demagun... Londongo alkateak hiritar txinatarren komunitatea eredu modura jartzen duela beraien negozioetan "jan, lo eta ugaltzen direla" esanez

Demagun... Rabateko alkatea harrokeriz eta nagusitasunez hitz egin eta jokatzera ohituta dagoela

Demagun... guzti horiek batuta, munduko alkaterik onena dugula

Athletic

Wed, 13 May 2009 16:08:43 +0000

Juan Kruz Lakasta Euskadi Irratian egunkarien lehen orrialdeko irakurketa egiten. Gararen gaurko portadaren gaineko komentarioa egiterakoan, argazkia deskribatu eta ondokoa bota du:

"Irudi hunkigarria Athletic-en zalea bazara; irudi erabakigarria umearen zaintza erabaki behar duen epailea bazara" (Juan Kruz Lakasta)

Ona!

rss bat galdu dut

Wed, 29 Apr 2009 02:51:14 +0000

Bi iritziemale politikoren harpidetza bakarrik dut google reader-en nire kontuan. Gaur bat galdu dut eta bakarra gelditu zait.

Auzokoen kalteari barre?

Wed, 04 Mar 2009 08:59:16 +0000

Ez dira hedabide tradizionalentzako garairik onenak. Gero eta hedabide enpresa gehiagotatik datoz itxiera eta langile kaleratze berriak. Kuriosoa da zein oihartzun izaten duten berri horiek medioetan (norberarenean eta besteetan). El País-eko langileek greba egin zutenean hedabide guztietan (El País-en ezik) eman zuten informazioa, zabal.

Gaur bi egunkaritako digitaletan ABCri buruzkoak irakurri daitezke:

Público: El diario ABC despide a la mitad de la plantilla
El País: Vocento presenta un ERE para 238 trabajadores de ABC

ABCren interneteko edizioan ez dut berria aurkitu (egia esateko, ez dut sakon aztertu, baina lehen begiratuan, ez dago ikusgai).

Ez dakit horrelako berriak idazteko agindua ematen duen erredaktore buruak edo zuzendariak (Público edo El País egunkarikoak, adibidez) nola egiten duen. Nik berria idazteko agindua irrifarre zabal batekin ematen irudikatzen dut; erredaktorea berriz, hurrengoa izan daitekeela pentsatuz, berria beldurtuta idazten duela ere erraz imaginatu dezaket. Ez dakit...